Իրադարձություններ Հայաստանում

Կայացավ «In Tour Expo 2017» միջազգային տուրիստական ցուցահանդեսը

Ապրիլի 21-ին «Երևան էքսպո» ցուցահանդեսային համալիրում բացվեց «InTour Expo 2017» 4-րդ միջազգային տուրիստական ցուցահանդեսը` ազդարարելով Հայաստանում և Արցախում տուրիստական սեզոնի մեկնարկը: Էքսպո-ցուցահանդեսի կազմակերպիչն է «Էքսպո Գրուպ» ընկերությունը: Նպատակն է ներկայացնել և վեր հանել Հայաստանում ու Արցախում տուրիզմի ոլորտը ներկայացնող ընկերությունները:

Պաշտոնական բացմանը ներկա էր զբոսաշրջության պետական կոմիտեի նախագահ Զարմինե Զեյթունցյանը, ով ողջունելով ներկաներին` կարևորեց   էքսպո-ցուցահանդեսի դերը և նշեց, որ կոմիտեի նպատակներից է զարգացնել կայուն զբոսաշրջություն: «Այսպիսի ցուցահանդեսները նպաստում են համամարդկային արժեքների պահպանմանը, զարգացմանը, միջազգային համերաշխության և խաղաղության ամրապնդմանն ու այդ գործընթացներում Հայաստանի դերի բարձրացմանը»:  Կոմիտեի նախագահը հայտնեց նաև, որ ցուցահանդեսը  մեծացնում է զբոսաշրջության նկատմամբ հանրային ուշադրության և շահագրգռվածության մակարդակը:

Մասնակիցներին ողջունեց Ռուսաստանի Դաշնության առևտրի ներկայացուցչության ղեկավար Անդրեյ Բաբկոն և նշեց, որ Ռուսաստանը Հայաստանի գլխավոր տնտեսական գործընկերն է, կարևորեց ռուս տուրիստի դերը Հայաստանում:

«Ես վստահ եմ, որ ռուսը Հայաստանում գլխավոր տուրիստն է և հետագայում նույնպես այս հիանալի երկրի տարածքում կաճի Ռուսատանից եկող տուրսիտների թիվը: Ա. Բաբկոն նշեց, որ Հայաստանում եվրոպական չափանիշներին հավասարազոր տուրիստական ծառայություններ կան: «Քիչ երկրներ ունեն այսքան որակյալ հյուրանոցներ, ռեստորաններ: Եթե վերակառուցվեն նաև ճանապարհները, ավտոտուրիզմը ևս կզարգանա և Հայաստանում տուրիզմը  բարձր մակարդակ կզբաղեցնի»,- հայտնեց Ա. Բաբկոն:

«InTour Expo 2017» 4-րդ միջազգային տուրիստական ցուցահանդեսին ելույթով հանդես եկավ նաև Արցախի էկոնոմիկայի փոխնախարար Սերգեյ Շահվերդյանը, ով նշեց, որ այս տարի Տուրիզմի համաշխարհային կամզակերպության անունից հայտարարված է կայուն զարգացման տարի և կարևորեց Հայաստանի ու Արցախի մասնակցությունն  այսպիսի ցուցահանդեսներին:

Ցուցահանդեսի ընթացքում զրուցեցինք «Էքսպո Գրուպ» ընկերության հիմնադիր-տնօրեն Վահագն Միրիջանյանի հետ:

–   Պարո՛ն Միրիջանյան, ո՞րն է Հայաստնում «InTour Expo» ցուցահանդեսներ անցակացնելու նպատակը:

–   Էքսպո-ցուցահանդեսի ընթացքում ցուցադրում ենք Հայաստանի զբոսաշրջության պոտենցիալը, այցելուներին ներկայացնում ենք մեր երկրի հանգստյան գոտիները և արձակուրդ անցկացնելու առավել պոտենցիալ տարբերակները: Նման միջոցառումները նպաստում են տուրիզմի զարգացմանը, քանի որ այստեղից մեկնարկում են նոր ուղղություններ, կազմավորվում են նոր տուր-փաթեթենր: Ցուցահանդեսը նպաստում է արդեն ձևավորված կապերի ամրապնդմանը և նորերի հաստատմանը:

–   Ի՞նչ նորություններով է այս տարի առանձնանում էքսպո-ցուցահանդեսը:

–   Ցուցահանդեսի շրջանակում պաշտոնապես ներկայացվել է եգիպտական ավիաուղիների մեկնարկը, ունենք նոր մասնակիցներ արտերկրից` Վրաստան, Ռուսաստան, Չեխիա, Սլովակիա, Եգիպտոս: Տարեց-տարի ավելանում է նաև մասնակիցների թիվը, այս տարի մասնակցել է 86 կազմակերպություն:

–   Ի՞նչ առաջարկներ ունեք արտասահմանում գտնվող տուրիստների համար:

Տարբեր երկրներում մասնակցում ցուցահանդեսների` ներգրավելու տուրիստների:  «Էքսպո Գրուպ» ընկերությունն այս տարի մասնակցել է Թեհրանում, Բեռլինում կայացած ցուցահանդեսներին, ներկայացրել հայաստանյան տուրիզմը: Աշնանը նոր պլաններ ունենք` ներկայանալ արտագնա տուրիզմում:

Էքսպո-ցուցահանդեսի ընթացքում շրջեցինք ներկայացված տաղավարներով:

Լիլիթ Հովհաննիսյանը ներկայացնում էր «Արմենիա տուրիստական» (Armenia TOURISM) պարբերականը, որը լայն տարածում ունի նաև ՌԴ-ում: Պարբերականի նպատակն է Հայաստանի մասին տեղակատվություն ներկայացնել: Մեզ հետ զրույցում ամսագրի տնօրեն Լիլիթ Հովհաննիսյանը կարևորեց Հայաստանում այսպիսի ցուցահանդեսների անցկացումը: «Իրականում անգամ փոքր միջոցառումը նպաստում է տուրիզմի զարգացմանը, ողջունելի է գոնե տարվա մեջ մեկ անգամ նման ցուցահանդես կազմակերպելը, որի ընթացքում տուրիստական գործակալությունները, հյուրանոցները կարող են իրենց առաջարկներով հանդես գալ, փոխհամագործակցություն ձեռք բերել»:

Զրուցեցինք  նաև էքսպո-ցուցահանդեսին առաջին անգամ մասնակցող «Հայք տուր» տուրիստական ընկերության տնօրեն Վարդան Ավագյանի հետ, ով նշեց, որ ցուցահանդեսին մասնակցելու նպատակներից մեկը իրենց լումայի ներդնել հայաստանյան տուրիզմի զարգացման գործում և նոր գործընկերների ձեռքբերումը: